Die Mitternachtssonne kommt näher...

Für's Gotti uf Walliserdiitsch gschribu... :-) 

4.6.15 – Kokkola

Am Morgund sii wer bi herrlichum, aber chaltum Sunnuwätter erwached. Na dum Früohstuck hei wer Sportsache montiert und si losgitrottod und –gfahru – schnüorstracks nu Wald, was de kei Wind meh sellti hä. Das isch öi der Fall gsi, derfir hend schi d’Mugge bim Brunzu fascht üfgfrässu. Darum hei wer der gresser Gang bim Spörtlu igleid und si wäge dem superschnäll anas mega schöns Platzji am Meer mituma verlotrottu Lüchtturm cho. Das äs nid lengwiilig chund, hed der Papa an Offroad-Strecki gfunnu, der aber de leider bald im Schlamm versuffu isch (also alles wieder zrugg – jetzt chänne wer biku, meint der Gianluca). Während miner erfrischund Dusch sind d’andru noch ufum Rollerpark gsi. Da isch der Gianluca uf d’Nasa kiit – d’Alessia hed mu ganz gschnäll gholfu und dum Papa ghöirod. Der isch de gad am Infostand gsi.

Nahdera Sterchig hei wer di Trottinet gipackt und si ind z’Stadtji ga Händsche ver die Purschtu und Leggins ver d’Mama ga chöifu. Der Papa hed de an warmi Schoggola gnu!

Und zum z’Nacht hed der Papa fritierti Minifischini als Biilag zer Tortilla gmacht – an Wunsch vam Gianluca.

5.6.15 – Reise Kokkola – Hiekkasärkät – Insel Hailuoto (Oulu)

Bi iischige Temperature si wer am Morgund am 9.30 losgfahru. Ufum Wäg hei wer an Stopp ama Strand gmacht, wa ver d’Finnu top soll sii. Doch bi 8 Grad sii wer d’einzigu gsi. Und scho wieder isch an heissi Schoggola neetig gsi! Horror!! Uf der Fahrt wiiter nordwärts is de immer heisser wordu – amal heds sogar 14 Grad gizeigt – 3 Minüte lang. Wier hei isch entschidu, mit der Gratisfähre va Oulu uf Hailuoto zgah. An super Platz hei wer gfunnu, doch das Schild – no Camping – hei wier öi verstannu (amal isch eppis uf Englisch agschribu gsi). De sii wer halt wiiter und hei as sandigs Platzji am Meer gfunnu. Der stahlblau Himmil hed ischi Lühna extrem gibessrod und aner sälbergibaschtlotu Fiirstell hed de z’Fleisch no besser gschmeckt. Fer vorna z’Ässu heds aber no nid glängt.

6.6.15 – Insel Hailuoto

Z’Wasser im Tank geit üs, der Wii isch fertig, d’Sunna isch wäg, z’WC isch voll – das isch doch gliich! Wier bliibe hie. Der Rägo, wa uf du spetru Namittag cho isch, macht iis deheimu so richtig heimelig. Und jetzt gits an Spaghetti Plausch, gwünscht va der Alessia! An Güote!